Turnverein Balsthal

Jahresbericht 2003 des Vize-Oberturners und des Ressorts Allgemeinturnen

Januar:
Gäng wie gäng gäge ändi Januar,
isch öisi GV das isch wunderbar.
Dr Gschäftlichteil isch nid so lang gange,
de het me chli ender is Kult chönne go umehange...

Februar/März:
Mässe, sage, bohre, schrube, schniide,
wie au Johr döi mir e chli übertriibe.
De no chli Farb, es gseht guet us, wei nid chlage
und scho hei mir e wunderbare Fasnachtswage.
Am Sunnti si si bim Umzug mit marschiert
d`Aphronixe & d`Macarenas hei de TVB guet präsentiert!
So ne Wage choschtet Gäud, hei jo dänk,
drum verchaufe si ihri Schnitzubänk.

März:
I auer Herrgottsfrühe, oh jeminee,
Fahre es paar Turner uf Saas Fee....
Öb boarde, schiine oder Aprés-Ski,
do isch jede Turner VOU derbii!!

April/Mai:
Träniere, schwitze, mässe, schnufe,
und immer göi d`Leischtige chli ufe.
Keim Turner isch si Leischtig glich,
jede het sich gfröit uf Öschtrich!!!

Juni:
Träniere, schwitze, mässe, schnufe,
und wieder göi d`Leischtige es bitzeli ufe.
Im Tränignsweekend hole mir dr letscht schliff,
dass mir am Turnfescht parat si ufe erscht Pfiff.

Juli:
ÄNDLICH in Dornbirn acho,
si mir au scho mit em Wettkampf dracho.
Turne, seckle, feschte, umegumpe,
mir hei nis würklich nid lo lumpe...

August, September, Oktober:
Und wieder döi mir ufene Alass häre träniere,
wo mir öise Verein wei präsentiere.
Baschtle und Bez. Haue dekoriere,
und es Programm ischtudiere.

November:
H2O, H2O, H2O, H2O, H2O,
und scho isch d`Obeungerhautig do.
Gäbe sich d`Hauptdarschtöuer d`Hang, isch`s e riese Gspass
wüu d`Lüt a de vordere Tische wärde nass.

Dezember:
Das isch dr Dume,
dä tuet guet ufrume,
dr dritt sammlet s`Tannechris,
dr nöchscht tuet Kerzli dra
und dr chli rüeft dr Samichlaus, dr Samichlaus, isch da!!

Übrigens:
Schiesse, goufe, OL, chegle und e Jass,
das macht durs Johr dure vüune Turner Spass.
Gsehsch e Turner mit Wanderschueh,
de treit är Houz uf d`Houzflueh.
Mit zwe Mannschafte startet dr TVB a de Gigagames z`Bipp
(das nach em Chlaus!!) wärde die einte zwöit, und die angere
dritt!!

 Logo Turnverein Balsthal